«Самұрық-Қазына» ұлттық әл-ауқат қоры басқарма төрағасының орынбасары Елена БАХМУТОВА:
БІЗ АЛЬЯНС БАНК ПЕН ТЕМІРБАНК ҚЫЗМЕТІНІҢ ТИІМДІЛІГІН АРТТЫРУ МҮМКІНДІКТЕРІН ҚАРАСТЫРЫП ЖАТЫРМЫЗ; ОЛ ҮШІН АТАЛҒАН ҚАРЖЫ ҰЙЫМДАРЫ БІРІКТІРІЛУІ ДЕ ҒАЖАП ЕМЕС

Соңғы кезде негізгі акционері «Самұрық-Қазына» мемлекеттік қоры болып табылатын банктерді біріктіру мәселесі қызу талқылануда. Бұл қауесеттер негізінен Альянс банк пен Темірбанкке қатысты айтылып жүр. Мәселенің мән-жайын «Интерфакс-Қазақстан» агенттігіне берген сұхбатында «Самұрық-Қазына» ұлттық әл-ауқат қоры басқарма төрағасының орынбасары Елена БАХМУТОВА баяндап берді.

- Елена ханым, «Самұрық-Қазына» қоры Альянс банк пен Темірбанкті біріктіру жайын қарастырып жатыр ма?

- Қазір «Самұрық-Қазына» қоры құрамындағы банктердің тиімділігін арттырудың түрлі жолдары қарастырылып жатыр. Әзірге нақты шешім қабылданған жоқ. Бірақ ұсыныстардың қай-қайсысы да қараусыз қалмайды.

Нақты шешім қабылданып жатса, тиісті мәлімдеме жасалады. Алайда бұл көп уақытты қажет ететін әрі өте күрделі процесс.

- Бұл мәселеге қатысты нақты шешім қашан қабылдануы мүмкін?

- Альянс банк пен Темірбанкті қайта құру туралы шешім қабылдау үшін алдымен кредиторлармен келісіп алуымыз керек. Сондықтан қазірше бірдеңе деп айта алмаймыз. Оны кредиторлар түсінбей қалуымыз мүмкін. Ал, кредиторларсыз біз аталған қаржы институттарын қайта құруға кірісе алмаймыз.

- Кредиторлармен келіссөз басталды ма

- Әзірге барлық мүмкіндіктерді тексеріп жатырмыз. Мүмкіндік туып, бұл мәселе әбден пісіп-жетілген кезде кредиторлармен ақылдасамыз. Сең әлі қозғалған жоқ.

Біз бәрін жан-жақты ойластыруымыз керек. Әзірше жариялауға тұратындай, рынокты дүрліктіретіндей нақты шешім қабылданған жоқ. Мәлімдеме жасауға әлі ерте.

Банктердің тиімділігін арттыру шаралары жан-жақты зерттеліп жатыр. Оның ішінде банктерді біріктіру туралы бастамалар да бар. Бірақ, бұл әзірге ұсыныс деңгейінен аса қойған жоқ.

- Құпия болмаса, тағы қандай жоспарлар бар?

- Банктерді сату мәселесі қозғалған-ды. Қазір Темірбанкті сатудан бас тартып отырмыз. Өйткені, жетекші қаржы институттарының проблемаларын ескерсек, банкті сатып алатындай лайықты клиент табыла қоймайды. Қайта құрылымдау талаптары бойынша біз бұл банктерді сату үшін рейтингі жоғары клиент табуымыз керек.

- «Самұрық-Қазына» қоры дағдарыс кезінде өтемпаздық қабілеті төмендігінен міндеттемелерін орындай алмай, қайта құрылымдаудан өтуге мәжбүр болған Альянс банк, Темірбанк пен БТА Банк сынды коммерциялық ұйымдардың негізгі акционері. БТА Банк қайта құрылымдау процесін тағы да өткізбек көрінеді. Жоғарыдағы қайта ұйымдастыру немесе біріктіру мәселенің БТА Банкке қатысы бар ма?

- Бұдан БТА да шет қалмауы мүмкін. Ол үшін алдымен жаңа ғана басталып келе жатқан қайта құрылымдау процесінің бастапқы кезеңін аяқтауымыз керек.

- Жалпы, қайта құрылымдаудан өткен институттарды қайта құру мәселесі міндетті түрде кредиторлармен бірлесе отырып шешілуі керек. Олай болмаған жағдайда «Самұрық-Қазына» қоры қайта құрылымдау міндеттемелерін бұзған болып шығар еді.

- Жоғарыдағы қайта құру мәселесінің басқа даму институттарына қатысты болуы мүмкін бе?

- Даму институттарын жетілдіру қажет. Осы жағынан алып қарағанда бұл нұсқаны да жоққа шығаруға болмайды. Бірақ, әзірше нақты ұсыныс жасалған жоқ. Кеңесшілердің даму институттарының тиімділігін арттыру туралы барлық ұсыныстарын қарастырып жатырмыз.

Даму институттары үкімет пен «Самұрық-Қазына» қорының саясатын жүзеге асыруы тиіс. Ендеше олардың да тиімділігін арттыруымыз қажет.

- Оларды бір құрылымға біріктіру ойда бар ма?

- Бұл аталған даму институттарының алдына қойған мақсаттарына байланысты мәселе. Себебі, әр институттың көздеген мақсаты бар ғой. Сондықтан біріктіру керек екен деп біріктіре беруге болмайды, оның да негізі болуы шарт. Нәтиже беретіндей болуы керек. Тағы бір рет қайталап айтқым келеді: біз әзірге ешқандай шешім қабылдаған жоқпыз.

Анықтамалық ақпарат.
«Самұрық-Қазына» қорына мемлекеттік даму банкі, Қазақстанның Инвестициялыққоры, Kazyna Capital Management, «Даму» кәсіпкерлікті дамыту қоры, «ҚазЭкспортГарант» сынды тағы да басқа даму институттары кіреді.

- Осы жерде: «Самұрық-Қазына» өндірістік және қаржылық активтерді басқаратын компания мен даму институттарын басқаратын құрылым болып қайтадан екіге бөлінуі мүмкін бе деген сұрақтың басы қылтияды...

- Ондай мәселе қозғалған жоқ. Қорды бөлу туралы ешқандай әңгіме болған емес.

Анықтамалық ақпарат
«Самұрық-Қазына» қоры 2008 жылы «Қазына» тұрақты даму қоры» (даму институттары шоғырланған) мен «Самұрық» мемлекеттік активтерді басқару холдингін біріктіру арқылы құрылған болатын.

- Сұхбатыңыз үшін рахмет!

Ақпан, 2012
© 2024 "Интерфакс-Қазақстан" агенттігі
Пайдаланғанда сілтеме жасау міндетті

Айдарлар мұрағаты